خطاب الرئيس أنور السادات، أمام أمناء الاتحاد الاشتراكي العربي، بمناسبة اجتماعهم الأول بعد الانتخابات، 15/9/1975
المصدر: "قال الرئيس السادات، الجزء الخامس 1975، السكرتارية الصحفية لرئيس الجمهورية، ط 1982، ص 276 - 286"

بسم الله ..

        أيها الأخوة والأخوات: لقائى بكم الليلة يصادف ذكرى يوم عظيم مجيد، يوم العاشر من رمضان.. وفى هذا اليوم حق علينا ان نحيى بالفخر أبطالنا فى القوات المسلحة الذين ما زالت أصابعهم على الزناد ونذكر شهداءنا الأبرار الذى هم أحياء عند ربهم يرزقون.. تحية الى جنودنا وضباطنا ملؤها الثقة والعرفان.

        اولئك الذين صنعوا لنا ولأمتهم الحياة وصنعوا لها الأمل بعد ان حطموا الخرافة وزرعوا النصر.

        أيها الأخوة والأخوات ..

        فى هذا اليوم ايضا يتم اللقاء الأول للأمناء بعد الانتخابات ولأول مرة للنقابات المهنية والعمالية والفلاحين. معنى هذا أننا خرجنا من دائرة التنظيم السياسى المغلق الى التنظيم السياسى المفتوح وبعد قليل سيتم تشكيل المجالس الشعبية على شتى مستويات القطر لأول مرة بالانتخابات وهى صورة اخرى للديمقراطية المباشرة، وقفزة تجعل الحكم المحلى بواسطة الشعب حقيقة واقعة ننتظر منها خيرا كثيرا إن شاء الله.

        تحالف قوى الشعب العاملة كلها اذن ممثل الآن على أوسع نطاق وبأكثر الأشكال ديمقراطية.

        أعود إلى العاشر من رمضان فأقول انه اليوم وبعد عامين تلك اللحظات التاريخية تبدو وآثار القرار الذى اتخذناه أكثر وضوحا واشراقا وتتأكد انعكاساته البعيدة على حياتنا وعلى حياة الأمة العربية وحياة العالم كله خصوصا واننا فى هذه الأيام بالذات نجنى ثمرة اخرى من ثمار عشرة رمضان بالبدء فى تنفيذ الانسحاب الاسرائيلى الثانى فى سيناء وبعد اسابيع قليلة ان شاء الله سينحسر الاحتلال عن الممرات الاستراتيجية وعن جزء هام من ثروتنا البترولية وعن معظم الساحل الشرقى لخليج السويس وتعود اعلامنا الظافرة لترفرف هناك.

        ولا شك أنكم تعرفون عن الزوابع التى حاول البعض ان يثيروها فى انحاء مختلفة من العالم العربى.. بيانات تصدر.. مظاهرات مرتبة تسير.. اتهامات تلقى جزافا.. وهى وان اختلفت مصادرها وبواعثها الا انها اتفقت كلها فى انها تجاوزت كل حدود الحوار المقبول والجدل الجائز، وإنها ايضا تسابقت فى الهبوط والاسفاف والانعدام التام للمسئولية ازاء اخطر لحظة فى حياة امتنا العربية وازاء قضية هى قضيتها المصيرية ولعل الذين يثيرون هذه الزوابع ظنوا انهم سوف يرهبوننا او سوف يرغموننا على سلوك طريق غير طريقنا أو فى القليل سوف يشوشون علينا ولكن لا.. ولم ولن يحدث شىء من هذا ابدا وأقولها وأكررها مرة أخرى.. لم ولن يحدث شىء من هذا بل ولن نقول هذا عن غرور او ادعاء ولكن نحن نقول هذا لأننا مطمئنون الى اننا ننطلق من منطلق احترام مسئوليتنا ازاء المصلحة القومية العليـا.. واننا نقرن الفعل بالعمل واننا لا نخادع ولا نضلل ولا ندعى ما لا قبل لنا به، فما تصدينا له وحققناه هو جزء مما التزمنا به واعلناه ونحن كما قلت مرارا لا نتكلم لغتين، لغة فى القاعات المقفلة، ولغة امام الميكروفونات ولا نستخدم وجهين، وجه للرأى العالم المحلى، ووجه للرأى العالم الدولى..

زوابع مفتعلة

        هذه الزوابع المفتعلة تذهب رياحها بسرعة لأنها تصدر عن أسباب ثانوية وصارعات ضيقة ومحاولات كسب صغيرة وفهم متخلف للعالم بل ولأمتنا العربية ايضا، فالأمة العربية سارت عبر التجارب الصعبة امة ناضجة لا تخدعها المزايدات، ولا تغريها الشعارات البراقة وأصحاب هذه الزوابع المفتعلة لا يعرفون انهم صاروا متخلفين عن وعى الأمة العربية الفاهمة لدوافع هذا الطرف أو ذاك..

        ولذلك يهمنى ان اؤكد لكم وان يثق معنا الشعب المصرى العربى ان الأغلبية الساحقة للرأى العام العربى معنا، وان الضمير العربى يقدر جهودنا وتضحياتنا، وان ما يحاول مثيرو الزوابع تصويره من ان مصر معزولة فهو امر يدعو الى السخرية والاشفاق..

        نحن نسير فى طريقنا، ونحن نرى ذخيرتهم الفاسدة  تنفذ بسرعة لأن ذخيرتهم هى الكلام وذخيرتنا التى لا تنفذ هى العمل المتواصل الحلقات.

        وسوف نحاول مرة اخرى ان نتحمل لممثلى الشعب الفلسطينى بالذات تسرعهم وانخداعهم، وأقول مرة أخرى لأننى سأروى.... كانت هناك مرة اولى وسأروى قصتها بالكامل امام امتنا العربية كلها.

لن يتغير موقفنا بسبب اى استفزاز

        فقد ان الأوان لكى توضع الحقائق واضحة، ليس امام شعبنا فقط الصابر المؤمن وإنما أمام امتنا كلها فى مواجهة هذا التضليل وهذا الخداع، أقول سوف نحاول ان نتحمس مرة اخرى لممثلى الشعب الفلسطينى بالذات رغم تسرعهم وانخداعهم مع أننا كنا معهم دائما صادقين وموقفنا من قضية فلسطين التى هى قلب الصراع العربى الاسرائيلى لن يتغير بسبب اى استفزاز ذلك أننا لا نفكر فى حزب أو بطريقة حزبية او فى منظمة بل نفكر فى المصلحة العليا للملايين الثلاثة الذين هم الشعب الفلسطينى الذى يستمع الآن وأريده ان يعرف قبل الشعوب العربية الأخرى حقيقة الموقف.

        لقد كافحنا فى الرباط لنسلم الزمام لمنظمة التحرير كممثلة لهذا الشعب وقلنا صراحة ان الصراع لاسترداد حقوق الشعب الفلسطينى هو صراع أجيال.. الأمر الذى ينير امامنا سبيل رسم الاستراتيجيات الناجحة ،وقلنا وأكدنا ان الفلسطينيين هم الذين يعبرون عن أنفسهم بملء ارادتهم، واننا لسنا أوصياء عليهم ولا ننوب عنهم فى اى شىء أما اذا سئلنا عن رأينا واجتهادنا

فاننا نرى ضرورة قيام وطن فلسطينى متحرر يتحمل المسئولية وساعتها علينا جميعا ان نؤازره. هذا هو التزامنا التاريخى لم يلحقه اى مساس، ولم تتحول ابصارنا عنه وهو ماثل فى ضميرنا فى كل تحرك نقوم به، وحين اشاع المغرضون ان هناك نصوصا سرية فى الاتفاق الأخير تحديناهم علنا ان يبرزوا نصا واحدا، ولكن لهذا الأمر قصة سأحكيها لكم ولأمتنا العربية، ولكنهم للأسف لم يجدوا ما يستشهدون به الا ما يلقطونه من أفواه الساسة الاسرائيليين فى تصريحاتهم المتضاربة التى يطلقونها للاستهلاك المحلى. ولطالما حذرت من هذا.

        وقد كان من أسخف ما لجأ اليه مثيرو تلك الزوابع محاولتهم الساذجة للتفرقة بين شعب مصر وقيادته ، أو العثور على شرخ فى الجبهة الداخلية المصرية لينفذوا منه.. فى هذا لم يخدعوا الا أنفسهم.. فقد ارتدت إليهم سهامهم حين بدت الجبهة الداخلية الوطنية بكل تياراتها وألوانها صامدة متراصة.

ايها الأخوة والأخوات..

        اننى هنا اقول للجميع وبصراحة وقد تكون هذه الصراحة موجعة ان ما يهم الأمة العربية هو شورى بيننا جميعا.. ولكن ما يخص الوطن المصرى هو ملك لأبناء هذا الوطن، طالما أننا فى ممارستنا لسيادتنا الوطنية لا نشترى شيئا بحقوق الغير ولا نقبل شيئا يعطل المسيرة العربية الشاملة.

        اننا لا نريد ان نغلق جسورا مفتوحة ولا ان نرد يدا ممدودة.. عقولنا وقلوبنا مفتوحة للحوار.. ولكن الحكم الأخير فيما يخصنا هو ارادتنا.. ليكن هذا واضحا للجميع.

        وعدتكم فى مستهل حديثى ان احدثكم عن هذا اليوم العاشر من مضان عام 1973.. وكنت قد أعددت نفسى لكى احاول أن اجمل ما حدث فى ذلك اليوم وما تلاه على ان يكون تركيزى أساسا هو احتفالنا بهذا اللقاء.. بعد ان نلتم ثقة الشعب فى الانتخابات، وأمامنا مرحلة جديدة تماما فى العمل السياسى ولكن لعل فى سرد احداث ذلك اليوم ما يجعلكم تخرجون بحصيلة ما يجب علينا ان نمارسه فى المستقبل.. ولعل فى إيضاح هذه الحقائق فى هذا اللقاء امام شعبنا وأمام أمتنا العربية وقد كنت أوثر ان ابقيها فى طى الكتمان أو على الأقل اكثرها- كما يفعل كل الناضجين الواعين، ولكن ما نسمعه الآن وما يقع من حولنا وخاصة ما وقع اليوم يجعلنى فى حل من ان اضع بعض الحقائق وليست كلها، برغم اننى كما قلت لكم كنت اتمنى ان نحتفظ بها للتاريخ.

محاصرة سفارتنا فى مدريد

        اليوم كما سمعتم فى الأنباء هوجمت سفارتنا فى مدريد وبخمسة من الفلسطينيين.. بعض الأخبار تقول انه يرأسهم عراقى والباقى فلسطينيين وبعض الأخبار تقول ان اثنين منهم من فتح، وبعض الأخبار الأخرى تقول ان مندوب فتح عندما دخل لهم احتجزوه معهم.

         كما تعلمون انا شكلت لجنة من نائب رئيس الجمهورية ورئيس الوزراء. ووزير الخارجية الآن يتابع الموقف لم يستطع ان يحضر معانا هذا الاجتماع لأنه بيتابع الموقف وسمعتم طبعا طلبات اللى دخلوا السفارة واحتفظوا بالسفير واثنين من الدبلوماسيين المصريين رهائن وطالبين سحب المجموعة العسكرية المصرية من جنيف، واعلان ان الاتفاق خيانة للأمة العربية والشعب المصرى.. اخر ما لدى من أنباء قبل ان احضر اليكم مباشرة لأنى اعلم انكم حريصين على متابعة هذا الموقف وشعبنا ايضا حريص على متابعة هذا الموقف. اخر ما لدى من أنباء انهم فى مفاوضاتهم مع السفراء العرب من الكويت والعراق والجزائر طلبوا اصدار بيان لشجب الاتفاقية.. طلبوا اولا مؤتمر صحفى للسفراء العرب يعملوه علشان يشجبوا الاتفاقية فرفض السفراء العرب.. قالوا طب ادونا بيان انكم بتشجبوا الاتفاقية قالوا طيب اذا كان ده يخلصكم نديكوا البيان وطلبوا طائرة جزائرية من الجزائر يسافروا عليها مع الرهائن الثلاثة واثنين من السفراء العرب، وردت حكومة الجزائر بانها تشجب هذا الأمر، ولكنها اذا طلبت حكومتنا والحكومة الاسبانية ذلك فانها على استعداد وقد وافقت وارسلت للرئيس بومدين قبل مجيئى اليكم مباشرة  موافقتى بهذا - ده آخر ما وصلت اليه الاحداث فى حادث اليوم.

        نعود الى يوم 10 رمضان لعل مفاتيح هذا الموقف التائه نعثر عليها... زى ما سمعتم فى يوم 10 رمضان من سنتين خلت وفى الساعة اثنين بعد الظهر بدأت قواتنا المسلحة فى الهجوم على سيناء بضربة طيران أولا. ثم بالعبور ثانيا، ولم يمض أكثر من ست ساعات حتى كانت المعركة واضحة واختل توازن الاسرائيليين تماما.

        فى هذه الساعات الست كان أغلب القوات اللى مفروض انها تتم عبورها اثناء الليل قد انتهت من عبورها ورفعت العلم واقتحمت خط بارليف فى ست ساعات. وكنت كما سمعتم وعرفتم قبل ذلك كنت فى غرفة العمليات منذ بدء العمليات فجاء لى خبر.. اتصلوا بى فى غرفة العمليات ان السفير السوفيتى طالب مقابلة عاجلة زى ما قلت لكم كان مضى ست ساعات.. الصورة واضحة كمان أكثر.. وبعد ست ساعات كانت واضحة جدا.. تركت غرفة العمليات وذهبت الى المقر اللى انا كنت متخذه للعمل فى قصر الطاهرة والتقيت بالسفير السوفيتى هناك - بعد ست ساعات فقط من بدء العمليات - ايه الرسالة اللى جايبها السفير السوفيتى، السفير السوفيتى قال لى انه جاى برسالة من القادة السوفيت الثلاثة - هذه الرسالة هى - ان سوريا طلبت وقف اطلاق النار وهو يريد ان يعرف رأينا فى هذا، بل وتطلب الحكومة السوفيتية ايضا ان نوافق على وقف اطلاق النار.. قلت للسفير السوفيتى اسف مش حنوقف اطلاق النار الا بعد تحقيق اهداف معركتنا.

        أما ما يختص بسوريا فقلت له اسمح لى لازم ارجع للرئيس حافظ الأسد علشان اعرف اذا كان قال الكلام ده والا لأ.. لأنه مش ده اتفاقنا اللى احنا متفقين عليه. كان اتفاقنا اللى احنا متفقين عليه - وده لأول مرة بيتقال- انه انا استدعى السفير السوفيتى

يوم الأربع 3 اكتوبر وهى يستدعى السفير السوفيتى فى دمشق يوم الخميس 4 اكتوبر

         كانت رسالتي انا للاتحاد السوفيتى اللى حاقولها يوم الأربع انه مصر وسوريا قرروا انهم يدخلوا عملية عسكرية من أجل انهاء هذا الوضع بتاع اللاسلم واللاحرب والتساؤل او تكملة الرسالة منى ما هو موقف الحكومة السوفيتية ، فعلا انا استدعيت السفير السوفيتى يوم 3 كان يوم أربع استدعيته بلغته.. قال لى امتى قلت له لسه ما قررناش انا والرئيس حافظ الأسد ساعة الصفر ليه سبت ده انا لأنه حسب اتفاقى مع الرئيس الأسد فى أغسطس 73 فى بلودان ان هو يوم الخميس 4 يقول لهم على الموعد انما أنا اطلب موقف الحكومة السوفيتية فهو لما سألنى السفير السوفيتى امتى قلت له لسه ما اتفقناش على ساعة الصفر ولكن أنا عايز الاجابة على سؤال محدد ما هو موقف الحكومة السوفيتية والاتحاد السوفيتى،

         يوم الخميس ثانى يوم فعلا حسب اتفاقنا استدعى حافظ الأسد السفير السوفيتى فى دمشق وابلغه حسب ما اتفقنا عليه بالرسالة وبموعد الهجوم ده كنا متفقين عليه.. السفير السوفيتى لما جانى يوم ستة قال لا ده  الرئيس الأسد يوم الخميس استدعى السفير السوفيتى قلت له عارف ومتفقين على ده.. وقال له على يوم الهجوم قلت عارف ومتفقين على ده.. وقال كمان عايزين وقف اطلاق النار بعد 48 ساعة قلت لا.. دى اسمح لى بأن أرجع للرئيس حافظ الأسد فيها، قال طب ما هو موقف مصر قلت له بلغ حكومته ان احنا مش حنوقف اطلاق النار الا لما نكمل اهداف معركتنا.  

         السفير السوفيتى ما اقتنعش قال لى بس ده يعنى الرئيس حافظ الأسد شريك وانا ببلغك هذا الكلام رسميا من الحكومة السوفيتية قلت له طيب ما انا علشان كده لازم أتأكد من الرئيس حافظ لان الكلام ده ما وردش فى اتفاقنا.

         خرج السفير السوفيتى- نسيت أقول لكم يوم الأربع لما استدعيته وحملته الرسالة طلب يقابلنى الخميس، فجه الخميس.. قلت لهم هاتوه على طول جه الخميس.. انا قلت مش معقول بعد 24 ساعة يجينى رد وأنا اللى باقعد بالسنين ما بيجنيش رد على حاجة.. مش معقول ده تبقى الدنيا اتغيرت.

         وفعلا بعد ما طلب يمكن بـ 10 دقائق بالكثير كان عندى فى البيت انا متوقع انه جاى لى برد على السؤال أو على الرسالة بتاعتى ما هو موقف الحكومة السوفيتية... قال انا جايب رسالة عاجلة قلت له خير قال الحكومة السوفيتية هاتبعت بكره الجمعة اللى هو 5 أكتوبر أربع طائرات نقل كبيرة وبتطلب موافقتك شخصيا على نزولهم فى مطار عسكرى لترحيل الرعايا السوفييت بكره يوم الجمعة 5 قلت له موافق ما عندى مانع ابدا وفعلا جت لى أربع طائرات يوم الجمعة وحتى اليهود رصدوهم وأمريكا على ان ده امداد جاى.. الـ 4 طائرات الكبار مش عارفين انهم جايين فاضيين علشان يحملوا العائلات افتكروا ان ده امداد.. بعد كده قلت له الاجابة طب كويس انا وافقت لك على ده... والمطار العسكرى غرب القاهرة ممكن علشان ما يبنش ادام المطار المدنى.. طب الرد على السؤال بتاعى ما هو موقف الحكومة السوفيتية فين... قال لى لسه تحت الدارسة.

         بعد ما بلغنا الرسالة يوم السبت وانصرف بعت للرئيس حافظ الأسد واتنشرت صورتها قبل كده تتنشر بكره كمان للتأكيد وقلت له ان حصل كذا وكذا.. وكذا وجانى السفير السوفيتى وأبلغنى كذا وكذا على لسانه. وأنا قلت له موقف مصر اننا احنا مش هانوقف اطلاق النار إلابعد تحقيق اهداف المعركة.

         وفات يوم 6 أكتوبر 10 رمضان وجه 7 أكتوبر 11 رمضان بعد الظهر السفير السوفيتى.. قالوا طلب مقابلة عاجلة كنت انا برضه فى الطاهرة مارحتش غرفة العمليات. العملية ماشية مش محتاجانى اقعد والقادة وغرفة العمليات وكل انسان كان قائم بمسئولياته تمام جالى يوم 7 بعد الظهر يتصادف انه قبل ما يوصلنى بنص ساعة وصلتنى رسالة الرئيس حافظ الأسد بالرد واستغربت إنها غابت 24 ساعة تقريبا موقف زى ده خطير لانى أنا بعت الرسالة بالليل ما جاتنيش الرسالة الا ثانى يوم بعد الظهر بالرد وقال انه ما حصلش الكلام ده.. خلاص ما حصلش وانا كنت واثق ان الكلام ده ما حصلش لانه ما اتفقناش عليه.. جالى السفير السوفيتى بعد الرسالة دى ما وصلت بنصف ساعة وقلت له كويس انك جيت لانه من نصف ساعة بس رسالة الرئيس الأسد اهيه.. الكلام اللى انت بلغتهولى امبارح خطأ من أساسه ولم يحدث وغير صحيح.

السفير السوفيتى يزيف الحقائق

         السفير السوفيتى وشه اصفر وقال لى دا أنا جايب لك الطلب الثانى من سوريا وبواسطة القيادة السوفيتية بضرورة وقف اطلاق النار فى هذا الوقت احتديت على السفير السوفيتى فعلا وقلت له اقفل هذا الموضوع لاننى باعتبر كلام حافظ الأسد فى هذا فاصل بالنسبة لهذا الموضوع وانتهى.. حاول يفتح معايا من قريب ومن بعيد قلت له لا.. مش مستعد اسمع حاجة ابدا.. انا بعت لسوريا الأسد قال لا.. يبقى لأ.. خلاص..

         ومشى السفير السوفيتى وقبل ما يمشى قلت له بلغ حكومتك فى هذا اليوم ده كان تانى يوم اللى هو يوم 11 رمضان و 7 أكتوبر قلت له بلغ حكومتك ان المعركة دى معركة النفس الطويل ومعركة دبابات اللى عنده دبابات اكثر ونفس طويل اكثر حيكسبها.. انا مش محتاج دلوقتى دبابات، لكن بلغ حكومتك ان انا عايز فى أقرب فرصة امداد دبابات كان يوم 7 ومشى.

         زى ما سمعتم صحانى السفير البريطانى فى يوم 13 أكتوبر بخبر الفجر.. كيسنجر بلغهم قال لهم... ان الاتحاد السوفيتى بلغ كيسنجر ان انا وافقت على وقف اطلاق النار فكيسنجر بعت عبر بريطانيا لان ماكانش فيه اتصال بيننا وعلاقتنا مقطوعة.

         فبعت عبر السفير البريطانى عبر رئيس الوزراء هيث ووزير الخارجية فى ذلك الوقت المحافظ وبعت السفير الفجر صحانى وقال.. هل الكلام ده صحيح عشان أمريكا تشتغل على وقف اطلاق النار .. قلت له ما حصلش لم يحدث وحكيت له المقابلتين اللى فاتوا يوم 6 و 7 واننا مش حنوقف اطلاق النار الا بعد تحقيق اهداف معركتنا.

حضور كوسيجين لمصر

         بعد ذلك جاء كوسيجين رئيس وزراء الاتحاد السوفيتى لمصر هنا وطلب منى وقف اطلاق النار أيضا، وقال نفس الكلام اللى قاله السفير السوفيتى من أن عندهم من سوريا أكثر من طلبين لوقف اطلاق النار.. قلت له انا أسف لان انا بعت لحافظ الأسد ورد على .. وانا مش مستعد اناقش هذا الموضوع وقبل تحقيق أهداف معركتنا مش مستعد أوقف اطلاق النار، حصلت الثغرة - وهو موجود حاول يضغط على بيها قلت له دى معركة تليفزيونية مسرحية خمس فرق بتوعى فى الشرق ولن ينسحب منهم عسكرى من الشرق.. ودباباتى فى الشرق والغرب وانا حتعامل معاه .. التهريج بتاع انهم حيوصلوا القاهرة والطريق للقاهرة قلت له ده تهريج وعملية مسرحية.. وسافر رئيس وزراء الاتحاد السوفيتى من هنا وانا رافض وقف اطلاق النار الى ان جه يوم 19 أكتوبر ورحت القيادة بعد نص الليل بناء على طلب القائد العام الله يرحمه المشير احمد اسماعيل وكان رئيس الأركان بتاعنا رجع كنت بعته من قبلها بثلاث أيام عشان يخلص عملية الثغرة والكلام ده أهمل.. فرجع.. ورجع أعصابه منهارة فالمشير اسماعيل قال لى لازم تيجى تشوف الوضع بنفسك كان حولى القادة كلهم حسنى والجمسى كلهم.

         واتخذت قرارى يوم 19 قلت له أبدا ما فيش حاجة ابدا تدعو لهذا ولا للانهيار بتاع رئيس الأركان ده وعزلت رئيس الأركان ليلتها وعينت الجمسى منذ 19 اكتوبر رئيس أركان.. بس قلت لاسماعيل ما تذيعشى هذا على القوات ولا على العالم لأن اسرائيل حتشمت بدون داعى لان هم اللى بيغيروا فى قايداتهم مش احنا اللى محتاجين تغيير فى قيادتنا .

واجهت امريكا عشرة أيام

         فى هذه الليلة بالذات كان بقالى عشر أيام بواجه أمريكا بذاتها.. اتخذت من العريش خلف الخطوط بتاعتى مباشرة بكل وضوح كده.. قاعدة وبقت تنزل الى العريش علشان الامداد يروح للجبهة فى أقل وقت ممكن طبعا كل شىء كان فى خدمة اسرائيل وبعدها عرفت انه كان القمر الصناعى الأمريكى بيصور كل يوم ولما انتقلت فرقة من فرقنا المدرعة من الغرب الى الشرق كطلب سوريا لتكثيف عملنا العسكرى علشان نجدتها من على جبهتنا احنا.. صوروا الأمريكان هذا ونقلوه  للاسرائيليين واتحطت عملية الثغرة من وقتها.

         وكل الكلام ده قاله اليعازر فى مذكراته مش محتاج ان احنا نستشهد بأحد عليه. ورئيس الأركان الاسرائيلى المعزول قاله فى مذكراته.

         يوم 19 لقيتنى بأحارب أمريكا عشرة أيام لوحدى فى الميدان، ونزلت أمريكا بكل ثقلها. الاتحاد السوفيتى ورايا.. قرار الخبراء ما ينسهش زيارة كوسيجين أنا رحبت بيها أكبر ترحيب اثناء المعركة .. وقلت له أهو هو ده الكلام.. ومن هنا نبدأ علاقتنا الحقيقية وننسى الماضى كله ودى تكون اساس العلاقة الحقيقية اللى تقوم بيننا حاول يتباهى على باللى بيبعتوه قلت له لا ماتتباهاش لأننا عبرنا القناة بكبارى الحرب العظمى الثانية اكبر مانع مائى فى التاريخ. أعبره بالكبارى بتاع الحرب العظمى الثانية اللى مدانيش غيرها الاتحاد السوفيتى والكوبرى بيتركب فى خمس ساعات.

         أتركبت الكبارى وعبرت وأزالت الحاجز الترابى أبو 17 متر كل ده فى أقل من 6 ساعات كانت كل قواتى جوه والكبارى اتركبت والدبابات دخلت. معجزة قلت له لا.. الكوبرى اللى عندك الجديد اللى اسمه (ب. اند. ب) اللى بيتفرد فى نصف ساعة مارضتوش تدهولى وادتولى أبو 5 ساعات قبلته.

معجزة العبور

         وعملت عمليتى ودخلت تقريبا بلا خسارة كان تقدير السوفيت ان القنال حيكون فيها من 40 الى 60 الف قتيل فى العبور رسميا وموقع عليه منهم عندنا وما تجاوزتش خسائرنا فى العبور 400 مع الكبارى ام خمس ساعات بتاع الحرب العظمى الثانية. ده الكلام ده لازم أقوله علشان الناس تعرف قواتنا المسلحة عملت ايه.. اى مجد.. لكن برغم هذا كنت حريص جدا. قلت له اهو ده الوقت اللى نبتدى بقى وبهذا الأسلوب نبتدى علاقات جديدة وفهم جديد وننسى اللى فات كله، لكن ما وافقتلوش على وقف اطلاق النار وما وافقتش ان الاتحاد السوفيتى يتكلم عنى لان انا قلت من زمان ان اللى يتكلم عن مصر.. مصر.. احنا مش الاتحاد السوفيتى. راح غضبان طبعا.

         زى ما قلت لكم يوم 19 لما جه موقف امريكا قدامى واخده قاعدة فى أرضى وده موقف الاتحاد السوفيتى ورايا.. كان عليه ان أخذ قرار ويوم 19 أخذت القرار الساعة 2 بالليل انى موافق على وقف اطلاق النار على الخطوط الحالية بضمان القوتين الأكبر وتنفيذ قرار 242 زى ما ورد فى القرار تمام.

رسالة لحافظ الأسد

         أول حاجة عملتها بعت رسالة الساعة 2 صباحا للرئيس حافظ الأسد فى سوريا وقلت له فيها.. شرحت له الوضع وقلت له ان انا اتخذت الآن قرار بوقف اطلاق النار لأنى لا أحارب أمريكا.. وأنا مستعد أن أحاسب على هذا القرار أمام شعبى هذا وأمام الأمة العربية كلها.. لكن أنا مش مستعد انى اضحى لا بشعبى ولا بقواتى ولا بالجيش المصرى كما حدث فى 67 تانى والرسالة اتنشرت ومعروفة.

         هنا بقى نبتدى مرحلة جديدة يعنى اللى فات مع تبليغات السوفيت ده كله .. انا قلت ده يمكن هم المسئولين عنه .. إنما من هنا

نبتدى مرحلة جديدة غريبة بتفسر أو بتلقى الأضواء على مواقف اليوم وعلى التضليل المتعمد اللى بيتحط قدام راجل الشارع العربى بعد وقف اطلاق النار انتم عارفين ايه اللى جرى انا طلبت وقف اطلاق النار وجه يوم 22 حزب البعث قال بيناقش العملية يومين بعدى.. بيناقش العملية لسه يومين يوافق على وقف اطلاق النار وإلا لا؟ وراح طالع على الأمة العربية بعد كده حزب البعث السورى وقال ان السادات هو اللى طلب وقف اطلاق النار وخسر المعركة بتاعة العرب.. وسوريا لأ، كانت حتعمل هجوم معاكس وسوريا كانت مستمرة فى المعركة طيب كانت سوريا فين وقتها واحنا كنا فين ودلوقت الأوضاع ما هى الأوضاع واضحة ومعروفة  ليه يتقال للأمة العربية واضطر أنا انى انشر برقيتى له يوم 19 اللى اتقال انه ما ادناش خبر بوقف النار وخد القرار لوحده  ولا عندناش خبر فوجئنا بوقف اطلاق النار يوم 22 يوم 19 الفجر عنده الرسالة واضطريت انشرها بالتاريخ 19 الساعة 2 الفجر طلع الكلام للأمة العربية ان السادات هو اللى طلب قف اطلاق النار ومصر هى اللى بوظت المعركة اللى وقفت لوحدى امام أمريكا عشرة ايام.

خطورة خط 22

         وبرغم أن أمريكا وقفتها على خط 22 اللى كان مقتل لاسرائيل باعترافهم وباعتراف اليعازر نفسه.. وقفتهم قواتنا المسلحة على خط 22 وعلشان كده انتهزوا الفرصة بعدها بساعتين من وقف اطلاق النار وعملوا الاختراق بهدف أنهم يكسبوا حاجة لأنه خط22 فى الغرب طلع أسوأ من وضعهم عما كانوا فى الشرق.

         طلع الكلام بأه احنا ما بنتكلمش وقلنا لهم نقفل مواضيعنا ونخلى المسائل دى للتاريخ لا.. حزب البعث طلع قال ان السادات هو اللى طلب وقف اطلاق النار وهو اللى ضيع المعركة بتاعة الأمة العربية..

         آدى بدء الكلام اللى أنا حكيت لكم عنه النهارده اللى هى عمليات المناورات والمزايدات والمسرحيات اللى بتتمثل على الأمة العربية النهارده..

وافقت على وقف اطلاق النار مضطرا

         ثبت انى بعثت لهم برقية من يوم 19 من قبلها بتلات ايام وشارح العملية تماما فى البرقية. قابل وقلبى يقطر دما. أنا بوافق على وقف اطلاق النار لأننى مش مستعد اتحمل تاريخيا مسئولية أن ادمر قوات مصر المسلحة مرة أخرى واضحى بأولادى وشعبى مرة أخرى وأنا باحارب امريكا ولا قبل لى بأمريكا.. وبأقولها.. مانا مش بتاع عنتريات ولا مزايدات انا ما احاربش أمريكا.. أحارب اسرائيل لكن ما أحاربش أمريكا..

         آدى أول المسرحيات اللى طلعت على الأمة العربية.. رديت عليه وطلعت الجواب. البرقية اللى راحت يوم 19 واتنشرت تقف المسرحيات.. لا جينا فى ديسمبر 73 بعد وقف اطلاق النار فى الوقت ده انا جمعت القيادة كلها عندى.. خطة تصفية الجيب حطيناها. صدقت على الخطة عينت قائد للثغرة لوحدها غير قاده الجيوش .. كل شىء انتهى وجاهز على الأمر فقط اللى أديه..

         وجه كيسنجر فى ديسمبر كان قبلها فات على فى نوفمبر. عملنا النقط الستة فات على فى ديسمبر قلت له الثغرة. بأحب أعرف ما هو موقف أمريكا يوم ما اصفى الثغرة.. لانى أنا ما يهمنيش موقف اى حد تانى غير موقف امريكا قال لى حندخل ضدك بكل قوة أمريكا لانه لن نسمح ان ينهزم السلاح الأمريكى مرتين. طيب والثغرة قال لى فى النقط الستة احنا كاتبين خط 22 فى اطار فض اشتباك.. فض اشتباك قطعا قال لى قبل ما أجيلك انا من هنا جبت البنتاجون مصور ومدينى الصورة قواتك ايه اللى أمام الثغرة وقوات الاسرائيليين ايه وعارفين الواقع وحتبقى مجزرة عارفين انها حتبقى مجزرة لكن سندخل ضدك

         لكن فى اطار فض الاشتباك الناس دول يروحوا الشرق لأنهم فعلا فى مأزق دلوقتى بوجودهم فى الغرب.. طيب ما تعمل لنا فض الاشتباك على طول كان قبلها الرئيس حافظ الأسد عندى قبل كيسنجر ما يفوت فى ديسمبر فات على الرئيس حافظ الأسد فاتفقنا انه لما كيسنجر يفوت يعمل لنا فض الاشتباك اللى قلت ان أنا بلغت الأسد بيه فى نوفمبر وهو انه بالنسبة لمصر يبقى الشرق بالنسبة لسوريا يروح يتفق معاهم عليه بس ما يكونش اقل من الخط اللى ابتدوا منه ومضافا اليه القنيطرة.

         والكلام ده كله شاهد عليه بومدين من نوفمبر لأن لما رحنا الجزائر فى اجتماع مؤتمر القمة قلت هذا الكلام كله لبومدين وهو شاهد وعارف.

"لا نخاف من جنيف"

         فلما فات على فى سبتمبر الأسد قلت له ان كيسنجر حيفوت جاى مصر وحيروح سوريا طبعا قال لى طيب وقلت له حيتكلم فى جنيف لان احنا مطلوب عقد مؤتمر جنيف وكان مطلوب عقده فى ديسمبر قال لى وايه رأيك انت. قلت له رأيى ان احنا نروح جنيف لأن احنا مش احنا الطرف اللى يخاف من جنيف. الطرف اللى يخاف من جنيف اسرائيل. قال لى طيب وأمريكا تتم لنا قبل جنيف فض الاشتباك.. قلت له لما ييجى كيسنجر حقول له ما فى شك.. فجانى كيسنجر وسألته السؤال اللى قلت لكم عليه.. رد عليه قلت له طيب قبل ما ينعقد جنيف مش تتمم فض الاشتباك على الجبهتين . قال لى يعنى أنا وعدتك ولكن ما أقدرش أعمل هذا قبل يناير .. وشرح لى ظروفه واقتنعت بها قلت له طيب وهو كذلك قال لى ايه رأيك فى جنيف قلت له مافيهاش حاجة احنا مانخافش من جنيف اللى يخاف من جنيف اسرائيل وعلى ذلك أعلنت اننى أنا رايح مؤتمر جنيف .

         جه هو راح لسوريا بعد كده وبعدين فجاة نعلن احنا ان احنا رايحيين جنيف.. تيجى سوريا أعلنت انها مش رايحة جنيف . . الله.. بعت ليه.. قال لأن ما اتعملناش فض الاشتباك على الجبتهين قبل ما نروح زى ما احنا متفقين.. الله ..طيب هو ده فى

ايدى .. ده فى ايد الطرف الثالث اللى هو كيسنجر مش انا وهو اللى يقدر يخلص ديسمبر والا يناير وبيقول ادونى يناير بس وابتدى على طول فى العملية - وخلاص.. يعنى المسألة مش تقصير من جانبى ده الطرف اللى حيعمل هذا بيقول انه مش جاهز قبل يناير راح سايقين فيها حزب البعث وزى عملية وقف اطلاق النار راحت قايمة مسرحية جديدة  مصر اتفقت مع أمريكا ومع كيسنجر على فض الاشتباك. وانها تطلع من المعركة وتسوى وتعمل حل منفرد وحتروح جنيف وسوريا البطلة واقفة لوحدها.. ويا عرب الحقوا سوريا احنا اللى واقفين لوحدنا فى الميدان.

أكاذيب سوريا

         ويسافر وزير خارجية سوريا مبعوثا من حزب البعث ويقابل العرب على الخليج وسمعتونى فى الاجتماع الأخير باروى القصة. يجينى جواب من فيصل الله يرحمه.. الفجر وبعدها بساعتين وزير ثانى من الكويت يجينى وزير خارجية السعودية جانى بالجواب من السعودية ووزير الدولة جانى بالجواب من الكويت والاثنين فى فزع ليه.. سوريا بلغتهم انها بقت فى الميدان لوحدها.. ومصر خرجت من المعركة ومتفقة مع كيسنجر ورايحة جنيف ومرواحها جنيف ليس الا واجهة فقط لاعلان الاتفاق الذى تم بينها وبين أمريكا وخرجت مصر بمقتضاها وعملت حل منفرد حاجة تقرف.. مسرحية طلعت للامة العربية وللعالم العربى حاجة تقرف حقيقى.. قرف.. وجالى الوزيرين مفزوعين من فيصل ومن أخونا صباح السالم أمير الكويت وقلت للوزيرين ما تسمعوش لهذا الكذب والاختلاق مصر عارفه واجبها القومى ومصر رايحة جنيف لأنها ما بتخافش من جنيف واللى يخاف هى اسرائيل ولن يحدث فض اشتباك حتى على الجبهة المصرية قبل يناير زى ما قال كيسنجر وحيحصل على الجبهتين مصر وسوريا.

         ده موقف مصر ولا بنعمل حل منفرد ولا سايبين سوريا لوحدها ولا ولا.. ادى تانى عملية مسرحية.. المسرحية الأولى وقف اطلاق النار، والمسرحية الثانية حكاية جنيف.

         والمسرحية الثالثة.. فوجئت فى يناير.. جه كيسنجر رحنا بقى جنيف واتضح انه جنيف ما كانتش واجهة ولا حاجة لاعلان الاتفاق اللى قال عليه وزير خارجية سوريا للعرب ان انا متفق مع الأمريكان وماشيين ومخلصين والحكاية كلها اعلان بس.

         جه جنيف فى يوم 21 وخلص يوم 24 وقعدنا مجتمعين وعلى الكيلو 101 وقفت انا الاجتماع فى مرحلة من المراحل وقلت الكلام ده ما يعجبنيش.. فجه كيسنجر فى يناير وابتدى كما وعد عملية فض الاشتباك على الجبهة المصرية زى ما وعد بالضبط وتتلوها الجبهة السورية.

         قامت مرة تانية قيامة سوريا حزب البعث.. مسائل بالنسبة لهم انا قلت هنا انها بتبقى نظرات ضيقة ونظرات حزبية وأوضاع داخلية طب ليه ندخل فيها القضية الكبرى بتاعتنا ونضلل شعوبنا وامتنا لما بيكون عندنا.. هو فيه واحد منا بيخلى من مصاعب داخلية عنده ما أنا عندى مصاعب داخلية اقتصادية وحاجات كتيرة وعمال اعالج فيها لكن عمرى ما دخلت هذا فى القضية القومية ابدا ولا اتخذت حجة لا لمهاجمة حد ولا للتشنيع على حد لا.. حزب البعث فى سوريا غير كده لقى مصر هاتمم فض اشتباك ولقى حكاية ان مصر خرجت من المعركة واتفقت مع امريكا ما مشيتش وانكشفت الحكاية.. وجاء ديسمبر وعدا ولا فيه اتفاق ولا فيه فض اشتباك ولا ولا ولسه يناير جاى ابتدأت عملية يناير.. قامت قيامتهم تانى فى الأمة العربية وفضل كيسنجر رايح جاى على فى اسوان.. الاتفاق الأولانى لغاية ما تم وكان توقيعه يوم جمعة الصبح.. يوم الجمعة الصبح جانى الراحل الرجل الطيب احمد الخطيب رئيس وزراء الحكومة الاتحادية اللى بيننا وبين سوريا وليبيا وده من قيادة حزب البعث من القيادة العليا بتاعتهم يعنى ما هوش صغير مكانة كبيرة ورجل عاقل ورزين.. وجانى فى اسوان يوم الجمعة الصبح فى هذا اليوم انا قاعد مستنى كيسنجر يوصل من اسرائيل علشان التوقيع هيكون الظهر على الكيلو 101 ووقت التوقيع هانكون قاعدين لأنى كنت انوى اقوم برحلة للعالم العربى وفعلا بعد التوقيع نفس هذا اليوم يوم الجمعة بعد التوقيع سافرت على طول للعالم العربى وبدأت رحلتى على طول جالى يوم الجمعة الصبح الخطيب وقال لى الوضع يعنى قد يسوء ويعنى بحكمتك انت وزميلك وشريكك تقدروا تسووا هذه المواضيع قلت له انا ما بعملش منكر دا عندكم علم بهذا الكلام من نوفمبر اللى فات ومتفق على الخطين الخط اللى لمصر فض الاشتباك والخط اللى لسوريا.. ويعلم هذا الرئيس حافظ الأسد ويعلمه الرئيس بومدين.. اللى كنا مجتمعين عنده فى الجزائر فى نوفمبر،. واحنا النهارده فى يناير ايه لزوم ده كله.

         فهمت منه ان سوريا ادت اوامر انه كل سورى هنا اذا وقع هذا الاتفاق ينسحب بما فيهم السفارة السورية وكله وكله واللى فى الاتحادية.. وكله اذا وقع الاتفاق..قلت له والله انا اسف.. انا هااوقع الاتفاق النهارده.. خلاص.. وكيسنجر كان فى الطريق قلت له كيسنجر جاى فى الطريق.

         قال لى طيب تعالى كلم الرئيس حافظ الأسد نطلبه فى التليفون من أسوان قلت له وهو كذلك وطلبنا الأسد وأثناء ما انا بأكلمه دخل كيسنجر قلت لهم قعدوه فى الجنينة.. كلمت الرئيس حافظ قلت له الأخ الخطيب بلغنى كذا وكذا وكذا.. انا لعلمك هاوقع الاتفاقية النهارده.. وحيحصل فض اشتباك عندك الخط اللى حكيت لك عنه عندى والخط اللى عندك بعدى على طول.. طيب أجل.. قلت له ولا لحظة.. قلت له انا باسأل سؤال هل الكلام ده صحيح معناه قطع علاقات اذا كان كده انا عامل بروجرامى اننى اكون بكره عندك اذا كان الكلام ده حقيقى يبقى مافيش داعى آجى.. اذا كان مش حقيقى انا هاوقع النهارده.. قال لا ما خدناش قرار بهذا وانا مستنيك بكره.. وفعلا يوم السبت تانى يوم رحت واجتمعت فى مطار دمشق بالجبهة الوطنية، اللى فيها حزب البعث وفيها بقية الأطراف الأخرى وشرحت موقفى وكان معايا ايامها الأخ سيد مرعى وخدنا جلسة فى المطار شرحت لهم كل حاجة فيها .

         وتطلع المسرحية الجديدة.. مصر عملت فض اشتباك وسابت المعركة .. وسايبة سوريا لوحدها والحقوا يا عرب سوريا لوحدها

المرة دى ما فيش الفلسطينيين.. لغاية دلوقت نلاحظ ما فيش الفلسطينيين.. مصر عملت.. العرب.. وشوية وقالوا ايه حرب استنزاف علشان سوريا واقفة لوحدها وتعمل حرب استنزاف وبعدين بعد ده كله حصل فض الاشتباك وبالخط اللى احنا قايلين له عليه من نوفمبر.

موقف يدعو للاشمئزاز  

         وانتهت العملية وهبطت العملية تانى لكن الى ان حصل ده طلعت سوريا عاملة حرب استنزاف وفى المعركة لوحدها ومصر تركت الميدان.. شىء مقرف مرة اخرى ادام الأمة العربية بس المرة دى الأمة العربية ما صدقوش ليه ؟ لانهم كانوا عارفين ان العملية ماشية وفض الاشتباك جاى وجه فعلا فض الاشتباك.

القضية القومية ومتاعب حزب البعث

         آدى مسرحية ثالثة.. وكله على مصر.. وانا موش فاهم يعنى لاننا احنا هل ذنبنا ان احنا بنرفض ان يتجمد الموقف ونعود للاسلم واللاحرب تانى.. نقوم نتهم هذه الاتهامات طيب يعنى عنده متاعب داخلية حزب البعث فى سوريا طيب ندخل القضية القومية ليه فى المتاعب الداخلية ماكلنا عندنا متاعب داخلية.

         بعدها جه نيكسون زارنا هنا.. اتفقنا انه الخطوة التالية تكون فى سبتمبر 1974 اللى تمت فى سبتمبر 75 الخطوة الثانية دى فض اشتباك ايضا على الجبهتين المصرية والسورية وراح من عندى نيكسون الى اسرائيل وخطب وحمل لهم هذا الكلام وقعدنا نجهز نفسنا وانا بقى قلت مابردش على حد خلاص كفاية بقى.. يعنى كفاية مسرحيات لكن كان صعبان على ليه نضلل امتنا ليه.. ليه نضلل شعوبنا؟ ليه ما نقولش الحقيقة.

         ورجع نيكسون للولايات المتحدة حصل اللى حصل فى ووتروجيت واستقال اتأجلت العملية من سبتمبر لان نيكسون استقال.. اتأجلت من سبتمبر لأكتوبر لنوفمبر لديسمبر ليناير.. هناك مافيش الا فبراير 75 لما جه كيسنجر هنا.. أول مرة السنة دى فى المحاولة الأولى اللى فشلت الحقيقة انا قرفت وما بقتش بأه أرد على أى كلام ليه. لان المسائل زادت وطفحت كل الحقائق بتتلوى قدام رجل الشارع العربى لا لشىء الا لتجريح مصر . انا النهارده بأقولها لأول مرة. بدون مصر ما كانش فيه معركة عربية لأنى صممت على عدم ايقاف اطلاق النار 17 يوم.

         انا ما بدعيش ومانيش مغرور.. انما البترول اتعمل لانه بعد ما تدخلت أمريكا.. الأمة العربية تدخلت بالبترول.

لست مغرورا

         قبل ما تتدخل أمريكا.. لو أوقفت اطلاق النار ما كان حايستخدم سلاح بترول وما كان هيكون العرب اللى طلعوا القوة السادسة زى ما هم النهارده انما لما اثبتنا للعالم 17 يوم منهم عشر ايام ادام امريكا.. انا مابمنش على حد ومانيش مغرور بل انا باعتبر ان كل شىء بيتم عندى هو نصر لسوريا. وكل شىء بيتم فى سوريا هو نصر لى ده مفهومى مانيش عارف ان حزب البعث له تفكير اًخر.

         جه كيسنجر فى يناير .اه فى فبراير وقعد فترة ورجع تانى فى مارس السنة دى قبل ما ييجى بأه فى مارس.. انا إتفاقى معاه وباعلنها لأول مرة عشان يسمعها اخواننا الفلسطينيين ويسمعها الشعب الفلسطينى فى كل مكان عشان يكون حكم.. انا قبل ما يجينى فى مارس باسبوع يكون بدأ الحوار مع الفلسطينيين.. قبل ما يجينى بعشر إيام طلع البيان الفلسطينى اياه.. الدور ده بأه حزب البعث لقى انه عمل ثلاث مسرحيات.

المسرحية الرابعة

         وقف اطلاق النار.. وفى مؤتمر جنيف. وفى فض الاشتباك الأول وما نفعوش وما جزوش.. عمل المسرحية الرابعة بواسطة الفلسطينيين. وقلت هذا الكلام لياسر عرفات فى الرياض. قبل البيان ما يصدر بخمس ايام كان عندى صورته اللى محطوط لهم من سوريا. البيان مكتوب من سوريا بدفع الاتحاد السوفيتى.. اللى بيتهم مصر انها بتقايض قطعة من الأرض بقطعة من المبادىء.

         وواجهت ياسر عرفات فى الرياض بهذا وقلت له البيان مكتوب في سوريا.. مكتوب لك فى سوريا.

         وقلت له على وقائع اكثر لما إتقال للجنة المركزية الفلسطينية فى دمشق ان مصر اتفقت خلاص هى وأمريكا والأردن اما احنا يا سوريا وفلسطين احنا رايحيين فى داهية. تعالوا نتفق وياما طلعوا حكاية القيادة المشتركة تعالوا نتفق لحسن مصر وابتدوا يدفعوا بالفلسطينيين ضدنا ومن وراء هذا كله على الملأ بأقولها الاتحاد السوفيتى كتب البيان وقبل كيسنجر ما ييجى بعشرة أيام طلع.. شتموا أمريكا وانا ماليش دعوة بشتيمة امريكا بيشتموها منهم لها هم احرار ترد امريكا انما جم على مصر وقال لك مقايضة، قطعة من الأرض بقطعة من المبادىء، وعلى طريقتهم وعلى طريقة الارهاب اللى هما متصورينها.

         قالوا وقد قررت اللجنة التنفيذية ارسال وفود الى البلاد العربية بعد ما طلعوا البيان جيت انا مطلع لهم تانى يوم انه انا آسف ما بقابلش وفد فلسطين انا عايز اللجنة التنفيذية بحالها تيجى هنا مش عايز وفد عايز اللجنة كلها تيجى هنا عشان بنتحاسب على مقايضة قطعة من الأرض بقطعة من المبادىء ايه الكلام دا عايزين تشتموا امريكا ماتشتموها انتوا احرار انما بتشتمنا احنا ليه العملية سوريا غيرت حزب البعث غير بدل هوه ما يعمل المسرحية عايز الفلسطينيين يعملوها وفي الرياض قلت لياسر عرفات وهو

سامعنى دلوقتى ياسر عرفات قلت له يا ياسر قدام الرئيس بومدين قلت له يا ياسر لما حد يحب يهاجم مصر بلاش ياخد يافطة فلسطين ويعلقها فى القضية الفلسطينية سيبوه يهاجمنى منى له بلاش ياخدوكم انتوا قدام ابومدين هذا الكلام وبالعربى الفصيح قلت له اذا كان الاتحاد السوفيتى عايز يهاجمنى بلاش تخليه يعلق يافطة فلسطين يا ياسر واذا كانت سوريا عايزة تهاجمنا بلاش تخليها تعلق يافطة فلسطين ادى اللى بقول عليه ان احنا مستعدين هنا فى الزوايا دى مستعدين نتحمل مرة اخرى لممثلى الشعب الفلسطينى تسرعهم واستجابتهم بأه مش انخداعهم لا دى استجابة لأنهم عارفين. عارفين اتقال لهم بعد ذلك ادى بنود الاتفاقية اللى توصلت اليها مصر مع امريكا وادى البنود السرية فيها وادى البنود العلنية فى مارس الماضى وفوجئوا هم والعالم كله ان مصر بتقول لا ومافيش لا اتفاقية ولا بنود سرية ولا بنود علنية مايخدوش موعظة من الكلام ده اللى بيجرى وهنا بدأت استخدام يافطة فلسطين وكلنا عارفين العالم العربى كله وكلنا عارفين ان اسم فلسطين حساس عند كل عربى قضية بيعتبرها كل عربى قضيته واحنا جميعا بنفنى عشانها.. الشعب دا هنا جاع واتعرى وبعد ما كان من أغنى بل اغنى الشعوب العربية بأه افقرها عشان قضية فلسطين ولا زعلش ولا عملش تسوية منفردة زى ما بيقال لهم من الاتحاد السوفيتى او من سوريا وانا قلت قبل كده كلمة التسوية المنفردة كلمة مستوردة لأنه دى حصل ان قالها لى جروميكو فى القناطر قلت له ولمدة ساعة كان نقاش.. قلت له انا اسف انا أرفض هذا الكلام رفضا باتا.. انا عارف واجبى العربى ومصر عارفة مسئوليتها العربية وجه حزب البعث دخل اليافطة الفلسطينية من مارس الماضى بيان كان لسه كيسنجر ماجاش لسه ماوصلشى ام قبل ما ييجى بيان وانه حنقايض قطعة من الأرض بقطعة من المبادىء ماردتش عليهم وقلت لهم اسف مابقابلش حد تجينى اللجنة المركزية بحالها عشان اناقشها.. انا مش خايف من حاجة وجه كيسنجر وطبعا ماحصلش الحوار بينه وبين الفلسطينيين لأن قبل ما ييجى بعشر ايام طالع فى البيان انا وهو.. طيب هو انا مالى، معركتهم مع أمريكا وبيشتموا ودى عملية بتبيع وتشترى عند الاتحاد السوفيتى لكن انا ماشفتش بالتجارة دى لا أنا اللى بيعمل صح بقول له صح واللى بيعمل غلط امريكا والاتحاد السوفيتى.. طبعا ماحصلش الحوار اللى احنا كنا متفقين عليه ليه ؟ لأن دول رافضين من الأول خالص.. يوم ما وصل هنا وبيشتغل فى الاتفاقية اللى فشلت واللى مصر قالت لا فيها عملوا حكاية الفندق اللى حصل فى اسرائيل باحكيها دى لأول مرة بعتوا ناس على فندق هناك فى اسرائيل فدائيين واقتحموا طيب دى عملية فدائية بتحصل كل يوم.. لكن الدور دا ادوهم قوارب مكتوب عليها بورسعيد ومصر واحنا جايين من بورسعيد واحنا جايين من مصر علشان كيسنجر وهو عندى اسرائيل تقول له طيب وانت بتشتغل ازاى على فك ارتباط ثانى ولا حاجة ومصر بعتت لنا الجماعة دول وبتاع واحد سمعنى منكم اتكلمت عنها الا النهارده ما اتكلمتش عنها ايضا اعتبرت ان دى حادثة من الحوادث اللى تفوت بس اسرائيل بقه كانت اشطر منهم ليه لأنها لقت امكانية انها تحدث بلبلة وسط الأمة العربية قامت تفننت وطلبت انهاء حالة الحرب الكلام ده من ايام نيكسون ما كان موجود هو وكيسنجر هنا فى جنيف 74 وراحوا اسرائيل للاتفاق على ان انهاء حالة الحرب ده امر لا يجوز مناقشته اطلاقا وكان تفسيرى له ولا يزال ان انهاء حالة الحرب معناه انى بقول لاسرائيل اتفضلى احتلى ارض، اقعدى خليكى قاعدة براحة واعلنتها وقلتها على لسانى وطلعت فى الأمة العربية ولكن ايه هى المسألة التهريج والصوت العالى والمظاهرات ويروحوا السفارة بتاعتنا فى دمشق ويخشوا يكسروها ما أنا اكسر لهم سفارتهم هنا بس احنا ما نلجأش لهذه الأساليب الغوغائية الشوارعية احنا بنفكر بعقلنا وبنحترم قضيتنا وبنحترم تفكيرنا وباحترام الناس اللى وقفوا معنا فى 6 اكتوبر انما كان اللى حصل منهم بقه بعد ذلك مستعدين نفضل واقفين معاهم باستمرار هو صعب انى انا ابعت اكسرها مش صعب ابدا والمظاهرة معروفة اللى اتعملت فى دمشق وتحت سمع وبصر الأمن ومين اللى عمل المظاهرة معروف.. أدى تاريخ دخول فلسطين ويافطة فلسطين حينما قلنا لا فى الاتفاق الأول لأن اسرائيل طبعا لقت ان الدنيا جاهزة انها تفرتك العالم العربى تعنتت جالى كيسنجر قلت له أسف انتهى الموضوع وفشل الاتفاق الأول، وقابلت الرئيس فورد فى سالزبورج وقبل ما اقابله لو تذكروا انا زرت الكويت والعراق والأردن وسوريا وفى سوريا اجتمعت بالرئيس الأسد اكثر من 3 ساعات وقلت له انا حاقابل فورد وفورد عايز  محاولة اخرى لفض اشتباك على الجبهتين.. اخطرته بهذا وانه اذا كان فض اشتباك فانا موافق على هذا وانا ما عندى مانع ابدا وانتهينا على هذا وبمنتهى الوضوح رجعنا من بعد فورد جه كيسنجر ابتدت المسرحية تدور الدور ده بقه.

         فى الثلاث مسرحيات اللى فاتت كان حزب البعث متصدر المرة دى دفع  الفلسطينيين يتصدوا وهو واقف ساكت أو بيشتغل من تحت والفلسطينيين هما اللى يكتبوا له وهما اللى ينشروا له البيانات وقضية فلسطين راحت ومصر خرجت من المعركة. الاتحاد السوفيتى رفض يحضر التوقيع احنا رحنا جنيف عشان الاتحاد السوفيتى بجد رحنا عشان خاطر الاتحاد السوفيتى انا كان ممكن اوقع الاتفاقية هنا فى الأرض اللى بتاع الأمم المتحدة اللى بين القوتين على أرضى فى سيناء هنا كان ممكن اوقعها زى الكيلو101 انما رحنا جنيف عشان الاتحاد السوفيتى الحقيقة قام هو الاتحاد السوفيتى بيتنمر زق سوريا وسوريا زقت اليافطة فلسطين.. وان ده اتفاق فيه هزيمة للقضية العربية واتفاق سياسى والاتفاق موجود وواضح وانا فى غير حاجة انى ادافع عنه لان انا عمرى ما احط نفسى فى موقف الدفاع ابدا.. واضحة وبنشتغل فى النور وما بتكلمش للحزب بلسان واطلع للأمة العربية بلسان واقول للفلسطينيين بلسان لا انا لسانى واحد مع الأمريكان مع الروس مع العرب مع كل انسان لهجتنا واحدة لسانا واحد سياستنا معلنة مش مخفية يروح يطلع فى البرقية اللى قرأتها لكم الدور اللى فات انه السفير السوفيتى رايح يقابل وزير خارجية سوريا ويقول ان روسيا رفضت وحترفض الذهاب للتوقيع ويقوم يتبادل معاه الوثائق وزير خارجية سوريا ويقول له طيب اتفضل ادى قرارات القيادة القومية والقطرية اللى بترفض هذه الاتفاقية مسرحية متفق عليها يعنى واحنا عارفين من الأول قلت لياسر عرفات يا ياسر ادام بومدين ما يروحش لك السفير السوفيتى ويقول لك بنود سرية وبنود علنية ايه واديك شفت لا سرى ولا علنى

وطلعت ما فيش حاجة وانتهت على لا شىء.. المرة دى برضه بنود سرية الاتحاد السوفيتى يقول ان احنا وقفنا صوت فلسطين عشان ده اتفاق سرى باعلنها والله للملأ أنا بعت لياسر عرفات قبلها وبقول له يا ياسر عيب ما يبقاش الراديو احنا مديينوا لكم ويشتمنا اما قال لا معاك حق.. استمر الراديو فى الشتيمة.

         اللى اكثر بأه اللى بعتله الخبر ده ممدوح سالم رئيس الوزراء بصينا التقينا صوت فلسطين نازل على ممدوح سالم من بغداد 3 أيام شتائم رهيبة ولسه فى ايدهم اذاعتنا قمت رحت باعت لياسر عرفات قلت له طيب انا غلطت اللى بعت لك وقلت لك يعنى عيب تشتمونا وانتم فى بلدنا والراديو ثانى مرة لما حيغلط الراديو نوقفه احنا عند حده وانا غلطت انى بعت لك ام كان النتيجة انتم شتمتم ممدوح سالم 3 أيام.. طيب واخدنا صوت فلسطين علشان نقول الحقيقة ما نقلش عملية المزايدات اللى ماشية دى. والتضليل يطلع الاتحاد السوفيتى بينشر انه إلى ده اتفاق من البنود السرية. ما بيهمناش الكلام دا كله وصلنا لغاية الاتفاقية دى

         فاضلة حاجة صغير قوى عايز اقولها لانه انا قلت الكلام ده وفى ₄/³ الحقائق لسه ما قلتوش برضه حفاظا على المستقبل وحفاظا على معانى رفقة السلاح.. مش عايز اقولها ومش حقولها دلوقتى ₄/¹ الحقائق ما أعلنهاش، أنا قلت دلوقتى الربع فاضلة حتى واحدة عايز ازودها علشان محطة الانذار اللى بتقولوا عليها محطة الانذار متاخدة من قاعدة امريكية.. وقاعدة اليكترونية والمجتهدين بقه حاتكشف الأمة العربية كلها وحاتكشف تحركات الدنيا كان مافيش قمر صناعى بتاع الأمريكان ماشى يصور العالم كله.. مش هنا يعنى دى بس لا اللى جت وحاتكشف الدنيا كلها وقاعدة امريكية وقاعدة وقاعدة طب احكى قصة بسيطة اختم بيها كلامى عشان توضح يمكن تلقى ضوء ومفاتيح مين اللى بيحرك الأشخاص على المسرح النهارده.

         أيام عبد الناصر الله يرحمه ما كان عايش وقبل ما يموت ولما راح فى الزيارة السرية اللى راحها فى يناير 70 زى ما سمعتم قبل كده كنت انا وهو فى القناطر لوحدنا وحصلت حكاية ابوزعبل فقال لى اطلب السفير السوفيتى وكبير الخبراء وجبتهم وقعدنا احنا الأربعة عبد الناصر وانا والسفير السوفييتى وكبير الخبراء وعبد الناصر طلب انه يزور الاتحاد السوفيتى لأن ضرب ابو زعبل كان معناه مرحلة جديدة للدخول على عمق مصر علشان ماكفاهمش الخط لا داخلين على العمق وحايضربوا التجمعات والمدن وده سببه ان صاروخ سام 3 مش عندنا.. مدينا سام واحد واثنين من سنة 63 و 64 وما ادوناش سام 3 اللى هوه بتاع الطيران الواطى وكلها بتاع العالى فييجى واطى ويخش على اى حته وايامها بقى طلعت اسرائيل تقول انا ضربت دهشور على بعد ربع ساعة من مصر.. م القاهرة صحيح فهى دهشور على بعد ربع ساعة من القاهرة.. ايدنا بتطول كل حتة.. عبد الناصر لما لقى الحكاية كده قال لى اطلب السفير طلبت له السفير السوفيتى وكان فى المحلة الله يرحمه فينوجرادوا الأول مش الثانى جه من المحلة الراجل وجاب كبير الخبراء واتفقوا.. عبد الناصر قال له انا لازم اروح موسكو وكان عنده انفلونزا الله يرحمه.. وكان عنده القلب وعنده م الأول سكر.. وقام راح تحامل على نفسه وراح موسكو واتفق على سام 3 وهوه هناك فى الزيارة دى قاموا قالوا له.. السوفيت اصل يظهر ذاكرتهم ضعيفة واتصوروا ان العملية ان انا معنديش فكرة عن اللى جرى كله وقت عبد الناصر زى مراكز القوى تماما برضه كانوا فاهمين اهبل مش واخد بالى..

         عبد الناصر رجع من الاتحاد السوفيتى فى هذه الرحلة رجع فى فبراير 70 فى اسعد حالاته.. وكأنه عاد له شباب عشرين سنة ورا.. لانه جاب حاجات برضه حرصا على السوفيت مش حاأقول ايه.. بس يبقوا عارفين انا عارف حا أقول منها حتة واحدة بس عشان يبقوا عارفين ان انا عارف.. لانه برضه انا حريص على السوفييت كأصدقاء مش كولى أمر.. كولى امر لا.. انتهى من زمان قوى.. لكن كأصدقاء اه انا حريص.. من ضمن اللى جابه قالوا له حانديك اليكترونيات لأن كلنا عارفين ان اسرائيل قدامنا بتستخدم الحرب الألكترونية.. اللى طلعت جديد تشويش واعاقة.. الحاجات دى سمة العصر قالوا له ح نديك اليكترونيات تنحط جنب القاهرة يوصل تأثيرها لغاية سوريا يعنى تعدى سيناء واسرائيل وتوصل لسوريا دا من ضمن 3 حاجات اتفق عليها معاهم.. وبلاش الأثنين التانيين لما ييجى وقتهم.. رجع فى اقصى حالات السعادة.. واحنا كان ناقصنا الحرب الالكترونية واسرائيل داخله وزى ما انتم عارفين طول عمرها بتتكلم بتقول انا متهمنيش العرب عددهم ميت مليون انا عندى النوع مش العدد.. انا لازم النوعين بتاعتى اقوى الكيف مش الكم نوعيتى اقوى واحسن.. حرب اليكترونية اسلحة ممتازة- كذا كذا- والعرب دول اى عدد معاه اى حاجة لما يكونوا مائة مليون حانخلص عليهم- وده اللى كانت بتذيعه وتشيعه فى العالم كله.. وعندهم  حرب اليكترونية فعلا واحنا معندناش.. قاموا الدور ده قالوا لعبد الناصر كده رجع عبد الناصر وكأن شبابه رجع عشرين سنة وراء من السعادة وجت بعد كده بعد ما مات مجتش الحاجات دى الا بعد ما مات جابوا الأجهزة  دى ركبوها جنب القاهرة السوفيت فيهم عيب مهماش عارفين ان اولادنا الضباط بيقرأوا أحدث ما فى العالم وبيسايروا العالم شرق وغرب وكل سلاح بيطلع وكل شىء جديد وكلهم واخدين فرق اركانات حرب- الله يرحمه المشير احمد اسماعيل كان واخد فرقة فى انجلترا زى ما هو واخدها فى روسيا وضباطنا كلهم اللى فى انجلترا وامريكا زائد روسيا واللى فى روسيا زائد امريكا او روسيا زائد انجلترا عارفين اللى فى الشرق والغرب والأسلحة بتطلع فى كتب بتنطبع فى الغرب، الأسلحة بتطلع والحرب كل شىء بينكتب النهارده بقى علم.. وبيطلع وبيقرأوه ولادنا ومتابعين كل حاجة قام لما جابوا الأسلحة الألكترونية.. العملية الألكترونية وحطوها هنا جابوا عليها عساكر روس.. ليه يا جماعة.. قالوا ده سر خطير ولايقترب منه مصرى قلت طيب عشان المعركة معلهش .. بس لما أدى اوامر تتنفذ.. قالوا آه طبعا.. طيب ولادنا الضباط مسكتوش راحوا شمشموا وشافوا العملية لقوا الأجهزة أجهزة عادية من عشرين سنة ورا.. مش جديدة ولا حاجة ومتعديش ومبتوصلش لنص كيلو .. ما بتجبش حاجة فى سيناء.. مش تعدى سيناء واسرائيل وتوصل

لسوريا.. أبدا.. وعملية عادية جدا ومش محتاجين حتى التدريب عليها لو استلموها اما جيت انا اصدرت قرارات الخبراء سنة 72 قمت قلت لهم اى وحدات ليكو هنا.. كنت قاصد دى بالذات.. اى وحدات ليكو هنا لازم تبقى تحت القيادة المصرية مش تحت قيادة موسكو لأنى بصيت لقيت انا بادى الأمر من هنا ومبيتنفذش الا لما موسكو ييجى الأمر منها وفى أغلب الأحيان موسكو ما بتوفقش والنتيجة الله.. طيب ودا ازاى يقعد فى الجيش عندى.. وده سبب من أسباب قرار الخبراء ازاى احارب واجزاء عندنا صحيح مهش فى ميدان القتال ومش ع الجبهة لكن ما بتخدش أوامر منى فلما اصدرت قرار الخبراء قلت لهم يا تبيعوا لنا الأسلحة دى يا إذا كنتوا مصممين عساكر روس يستنوا عليها اسحبوها مع العساكر بتاعتكم.. قالوا نسحبها مع العساكر قلت لهم مع السلامة.

         من ضمن الأسلحة اللى كانت هنا كان أربع طيارات اللى بيقولوا عليها ميج 25 ودى سموها الغرب فوكس باك.. طيارة ممتازة.. الألكترونات على فكرة اللى انا حكيت عنها مش معناها ان الروس معندهمش.. لا.. الروس عندهم زى امريكا تمام.. بس عادتهم زى العادة ما يدوناش احنا الا نمرة عشرين عنده.

         الفوكس باك دى لا.. اهى دى بقى طيارة فى العالم معروفة مفيش زيها 3 مرات سرعة الصوت وحاجة قوية جدا كان موجود عندى اربعة منها هنا وقالوا دى تساعدك تعمل لك استطلاع وتجيب لك معلومات و.. و.. و.. لقيتها نفس الكلام ما بتطيرش إلا بأوامر من موسكو وكل ما ندى امر يقولوا ده ضباب.. ده النهارده مش عارف ايه لا دا فيه عطل ما بتنفذش الأوامر ففى قرار الخبراء قلت لهم مع السلامة يا تبيعوه لنا وولادنا يتدربوا عليه ياخدوه ويستلموه زى بقية الأسلحة يا تخدوه.. فسحبوا الأجهزة الألكترونية دى وسحبوا الأربع طيارات دول بتوع الاستطلاع.

         أثناء الحرب بعتولى قالوا ايه رأيك نرجع لك الأربع طيارات علشان يعملوا لك استطلاع.. انا معنديش استطلاع.. محدش يجيب لى القمر الصناعى الأمريكانى.. ويقولوا أدام العالم أهه كله بيدى لاسرائيل يوماتى.

         انا محدش بيدينى.. قمر صناعى.. ومعلوماتى عليا ان انا احصل عليها بالطيران بتاعى واخش اصور واخش فوق المناطق اللى فيها العدو على بطاريات صواريخ وعلى كل حاجة.. قالوا لا.. ودى .. الطيارة دى بقى تصور من بعيد.. ممكن ما تخشش خ